Дуо
Муҳаммад Солиҳ
Бисмиллаҳир Роҳманир Роҳийм
Ўксиз қалбим ичинда йиғламоқда бир диёр,
Дунёларнинг гўзали йиғлар буюк мамлакат.
Йиғлар кўзда ёши йўқ, қўлида йўқ ихтиёр,
Бошида ҳамширадек энгашгандир ҳалокат.
Раббим, Раҳмонурроҳийм, бу зулм саҳросида,
Мунгли бошлар устида ёз раҳмат соябонин.
Бизга, ЭРК туйғуси бер, бир туйғуки осуда
тонгда уйғотсин забун диёрнинг соҳибини!
Раббим, кўриб турибсан, зардоб тўла ҳалқумим,
Битир бу имтиҳонни, ҳақорат қомусини.
Оллоҳим, қайтариб бер бахтиқора халқимнинг,
Россия даштларида йўқотган номусини.
Миллатимнинг қуриган томирига қон йўлла,
Нур бер унинг ғафлатдан хиралашган кўзига -
Токи ўрнидан туриб, Cен берган кучли қўл-ла,
Тарихий шапалоқни тортсин Золим юзига!